കോഴിക്കോട്: പ്രമുഖ സിനിമാ നിർമ്മാതാവും വ്യവസായിയുമായ പി വി ഗംഗാധരൻ അന്തരിച്ചു. 80 വയസായിരുന്നു.കോഴിക്കോട്ടെ സ്വകാര്യ ആശുപത്രിയില്‍ ഇന്ന് രാവിലെ 6.30 നായിരുന്നു അന്ത്യം.ഹൃദയസംബന്ധമായ അസുഖത്തെ തുടർന്ന് ഒരാഴ്ചയായി ചികിത്സയിലായിരുന്നു. നിര്‍മ്മാതാവ് എന്ന നിലയില്‍ രണ്ട് തവണ ദേശീയ ചലച്ചിത്ര പുരസ്കാരവും അഞ്ച് സംസ്ഥാന പുരസ്കാരങ്ങളും അദ്ദേഹം നേടിയിട്ടുണ്ട്.
ഗൃഹലക്ഷ്മി പ്രൊഡക്ഷന്‍സിന്‍റെ ബാനറിൽ നിരവധി ശ്രദ്ധേയ സിനിമകള്‍ നിർമ്മിച്ചു.മലയാള സിനിമയിലെ മുന്‍നിരക്കാര്‍ക്കൊപ്പം എക്കാലവും പ്രവര്‍ത്തിച്ച പി വി ഗംഗാധരന്‍ നിര്‍മ്മിച്ച ചിത്രങ്ങള്‍ ഒരേസമയം കലാമൂല്യവും ജനപ്രീതിയും ഉള്ളവയായിരുന്നു.ഒരു വടക്കന്‍ വീരഗാഥ, കാറ്റത്തെ കിളിക്കൂട്, തൂവല്‍ കൊട്ടാരം, എന്ന് സ്വന്തം ജാനകിക്കുട്ടി, അച്ചുവിന്‍റെ അമ്മ തുടങ്ങി ഇരുപതിലേറെ സിനിമകള്‍ പി വി ഗംഗാധരൻ നിര്‍മ്മിച്ചു.
എഐസിസി അംഗമായിരുന്ന അദ്ദേഹം 2011 ല്‍ കോഴിക്കോട് നോർത്ത് മണ്ഡലത്തിൽ നിന്ന് നിയമസഭയിലേക്ക് മത്സരിച്ചെങ്കിലും വിജയിച്ചില്ല. മാതൃഭൂമി മുഴുവൻ സമയ ഡയറക്ടര്‍ ആയിരുന്നു. മാതൃഭൂമി മാനേജിംഗ് എഡിറ്റര്‍ പി വി ചന്ദ്രന്‍ സഹോദരനാണ്. ഷെനുഗ, ഷെഗ്‍ന, ഷെര്‍ഗ എന്നിവർ മക്കളാണ്.