ആലപ്പുഴ: സുഹൃത്തുക്കളുടെ മദ്യപാനത്തിനിടയിലെ തർക്കം കൂട്ടുകാരന്റെ മരണത്തിൽ കലാശിച്ചു. കരീലക്കുളങ്ങരയിൽ കൂട്ടുകാർക്കൊപ്പം മദ്യപിച്ച ചെങ്ങന്നൂർ ഇലഞ്ഞിമേൽ സ്വദേശി സജീവ് എന്ന ഉണ്ണിയാണ് സുഹൃത്തുക്കളുടെ മർദനമേറ്റ് മരിച്ചത്. 32 വയസ്സായിരുന്നു. സംഭവത്തില്‍ 3 പേരെ കസ്റ്റഡിയിലെടുത്തു.
നങ്ങ്യാർകുളങ്ങര തുണ്ടിൽ വീട്ടിൽ പ്രവീൺ, അരുൺ ഭവനത്തിൽ അരുൺ, ചെങ്ങന്നൂർ ഇലഞ്ഞിമേൽ മനോജ് ഭവനത്തിൽ മനോജ് എന്നിവരാണ് അറസ്റ്റിലായത്. മർദ്ദനത്തെ തുടർന്ന് അവശനിലയിലായ സജീവിനെ ഇവർ തന്നെയാണ് ഹരിപ്പാട് താലൂക്ക് ആശുപത്രിയിൽ എത്തിച്ചത്. അപകടം പറ്റി എന്നാണ് ഇവർ ആശുപത്രി അധികൃതരോട് പറഞ്ഞത്. സംശയം തോന്നിയ ജീവനക്കാരും അവിടെ ഉണ്ടായിരുന്നവരും ചേർന്ന് ഇവരെ തടഞ്ഞു വെക്കുകയും പോലീസിൽ വിവരമറിയിക്കുകയുമായിരുന്നു. പോലീസ് നടത്തിയ ചോദ്യം ചെയ്യലിലാണ് സത്യം പുറത്തു വന്നത്‌.