കോഴിക്കോട് : നടനും സംവിധായകനും നാടകകൃത്തുമായ വിക്രമന്‍ നായര്‍ അന്തരിച്ചു. 77 വയസായിരുന്നു.വാര്‍ധക്യ സഹജമായ അസുഖങ്ങളെ തുടര്‍ന്ന് കോഴിക്കോട്ടെ സ്വകാര്യ ആശുപത്രിയിൽ ചികിത്സയിലായിരുന്നു.നാടക പ്രവര്‍ത്തകരായ തിക്കോടിയന്‍, കെ ടി മുഹമ്മദ് എന്നിവരോടൊപ്പം നിരവധി നാടകങ്ങളില്‍ പ്രവര്‍ത്തിച്ചിട്ടുണ്ട്.
കേരള സംഗീത നാടക അക്കാദമിയുടെ ഉൾപ്പെടെ നിരവധി പുരസ്‌ക്കാരങ്ങൾ അദ്ദേഹം നേടിയിട്ടുണ്ട്. തിക്കോടിയന്റെ മഹാഭാരതം എന്ന നാടകത്തിലെ അഭിനയത്തിന് മികച്ച നായക നടനുള്ള സംസ്ഥാന അവാര്‍ഡ് നേടി.സ്‌കൂള്‍ പഠന കാലത്ത് തന്നെ നാടകത്തില്‍ സജീവമായിരുന്ന വിക്രമൻ നായർ കോഴിക്കോട്ടെ സംഗമം തീയേറ്റേഴ്‌സിൽ അടക്കം നിരവധി നാടക ട്രൂപ്പുകളിൽ പ്രവർത്തിച്ചിരുന്നു.
അഗ്രഹാരം . ബൊമ്മക്കൊലു, അമ്പലക്കാള എന്നിവയാണ് പ്രധാന നാടകങ്ങൾ. മരക്കാര്‍ അറബിക്കടലിന്റെ സിംഹം, വൈറസ്, പാലേരി മാണിക്യം എന്നീ സിനിമകളിലും അഭിനയിച്ചു.കോഴിക്കോട് സാമൂതിരി ഗുരുവായൂരപ്പന്‍ കോളേജിലായിരുന്നു വിക്രമൻ നായർ ഡിഗ്രി പഠനം പൂര്‍ത്തിയാക്കിയത്.1985 ൽ സ്റ്റേജ് ഇന്ത്യ എന്ന പേരില്‍ സ്വന്തമായി ഒരു നാടക ട്രൂപ്പിന് രൂപം നല്‍കിയിരുന്നു