കോട്ടയം: പുതുപ്പള്ളി ഉപതെരഞ്ഞെടുപ്പിൽ ചാണ്ടി ഉമ്മനെതിരെ പ്രചാരണത്തിനിറങ്ങുമെന്ന് ബിജെപി ദേശീയ സെക്രട്ടറി അനിൽ ആന്റണി.ബിജെപിക്ക് വേണ്ടി താനും പ്രചാരണത്തിന് ഉണ്ടാകുമെന്ന് അനിൽ പറഞ്ഞു.നേരത്തെ ബിജെപി സ്ഥാനാർഥികളുടെ സാധ്യത പട്ടികയിൽ അനിലിന്‍റെ പേര് കേട്ടിരുന്നെങ്കിലും വാർത്തകളെ അദ്ദേഹം തന്നെ തള്ളിയിരുന്നു.അതെല്ലാം ഊഹാപോഹങ്ങൾ മാത്രമാണ്. ആര് സ്ഥാനാർഥിയാകണമെന്ന് പാർട്ടി തീരുമാനിക്കും എന്നായിരുന്നു അനിൽ പറഞ്ഞത്.
പാർട്ടി പറയുന്ന കാര്യങ്ങൾ, പറയുന്ന ചുമതലകൾ ഞാൻ ചെയ്യുന്നു. സ്റ്റേറ്റ് കമ്മിറ്റിയുടെ യോഗം ശനിയാഴ്ച ചേരുന്നുണ്ട്. പുതുപ്പള്ളിയിലെ സ്ഥാനാർഥിത്വവുമായി ബന്ധപ്പെട്ട് ചർച്ച ചെയ്യും. പുതുപ്പള്ളിയിൽ ബിജെപി സ്ഥാനാർഥിക്ക് വേണ്ടി പ്രചാരണത്തിനിറങ്ങും’ അനിൽ ആന്റണി പറഞ്ഞു.
തെരഞ്ഞെടുപ്പ് പ്രവർത്തനങ്ങൾ ആരംഭിക്കുന്നതിന് മുൻപ് തലസ്ഥാനത്തെത്തി എകെ ആന്‍റണിയെ ചാണ്ടി ഉമ്മൻ കണ്ടിരുന്നു. തലയിൽ കൈവച്ചായിരുന്നു ആന്റണി ചാണ്ടി ഉമ്മന് വിജയാശംസ നേർന്നത്. ഉമ്മൻ ചാണ്ടി ഇല്ലാത്ത കോൺഗ്രസ് രാഷ്ട്രീയത്തോട് പൊരുത്തപ്പെടാനായിട്ടില്ലെന്ന് എകെ ആന്റണി പ്രതികരിച്ചു.
ഈ തെരഞ്ഞെടുപ്പിൽ പുതുപ്പള്ളിക്കാർ ഉമ്മൻ ചാണ്ടിയെ മറക്കില്ല. ഉമ്മൻ ചാണ്ടിയെ ഇല്ലാത്ത കളങ്കം ആരോപിച്ച് വേട്ടയാടിയത് പുതുപ്പള്ളി ഓർക്കും. അത് ശരിയോ തെറ്റോ എന്ന് ഈ തെരഞ്ഞെടുപ്പ് തെളിയിക്കും. ആ കുടുബത്തെ ഉൻമൂലനം ചെയ്യാൻ നോക്കി. ചാണ്ടി ഉമ്മനെ തേജോവധം ചെയ്യാൻ നടത്തിയ നീക്കവും മറക്കില്ല. അപ്പന്‍റെ പിൻഗാമിയായി മകൻ എത്തുന്നു. പുതുപ്പള്ളിയിൽ അതിശയകരമായ ചരിത്ര വിജയമുണ്ടാകുമെന്നും എകെ ആന്റണി പറഞ്ഞിരുന്നു.
മുതിർന്ന കോൺഗ്രസ് നേതാവ് എകെ ആന്‍റണിയുടെ മകനായ അനിൽ ആന്റണി. അടുത്തിടെയാണ് ബിജെപിയിൽ ചേർന്നത്. ബി ജെ പി ദേശീയ സെക്രട്ടറി പദവി നൽകിയായിരുന്നു പാർട്ടി സ്വീകരിച്ചത്.