തൃശൂർ: ആലത്തൂർ മണ്ഡലത്തിൽനിന്ന് മത്സരിക്കുന്ന എൽഡിഎഫ് സ്ഥാനാർഥി മന്ത്രി കെ രാധാകൃഷ്ണനെ ഉന്നത വിജയത്തിലേക്ക് എത്തിക്കണമെന്ന അഭ്യർഥനയുമായി കലാമണ്ഡലം ഗോപി. രാധാകൃഷ്ണൻ്റെ സ്വഭാവത്തെ സംബന്ധിച്ചു തനിക്ക് നല്ലപോലെ ബോധ്യമുണ്ടെന്നും അതുകൊണ്ടാണ് വോട്ടഭ്യർഥിച്ചു താൻ എത്തിയതെന്നും കലാമണ്ഡലം ഗോപി.
തൃശൂരിലെ എൻഡിഎ സ്ഥാനാർഥി സുരേഷ് ഗോപിയുമായി ബന്ധപ്പെട്ട വിവാദത്തിനിടെയാണ് കെ രാധാകൃഷ്ണനായി വോട്ടഭ്യർഥിച്ചു കലാമണ്ഡലം ഗോപി രംഗത്തെത്തുന്നത്.സുരേഷ് ഗോപിക്ക് വേണ്ടി തന്റെ പിതാവിനെ സ്വാധീനിക്കാൻ ശ്രമം നടക്കുന്നുവെന്ന ആരോപണവുമായി കലാമണ്ഡലം ഗോപിയുടെ മകൻ രഘുരാജ് രംഗത്തെത്തിയിരുന്നു. സുരേഷ് ഗോപിക്ക് അനുഗ്രഹം നൽകണമെന്ന് പറഞ്ഞ് പ്രശസ്തനായ ഒരു ഡോക്ട‍ർ ബന്ധപ്പെട്ടെന്നും അത് നിരസിച്ചപ്പോൾ പത്മഭൂഷൺ വാഗ്‌ദാനം ചെയ്തുവെന്നും അങ്ങനെയുള്ള പത്മഭൂഷൺ വേണ്ടെന്ന് തൻ്റെ അച്ഛൻ് പറഞ്ഞുവെന്നുമായിരുന്നു രഘുരാജ് ഫേസ്ബുക്ക് കുറിപ്പിലൂടെ ആരോപിച്ചത്.
കഥകളിക്കാരനായ താൻ രാഷ്ട്രീയത്തിലേക്ക് പ്രവേശിച്ചോ എന്ന് നിങ്ങൾ ആലോചിക്കുന്നുണ്ടാകാം. താൻ കലാമണ്ഡലത്തിലെ അധ്യാപകനായിരിക്കെ കലാമണ്ഡലവുമായി വളരയധികം ബന്ധപ്പെട്ടു പ്രവ‍ർത്തിച്ചയാളാണ് കെ രാധാകൃഷ്ണൻ. തങ്ങൾ അങ്ങേയറ്റം സുഹൃത്തുക്കളെ പോലെയാണ് പ്രവ‍ർത്തിച്ചത്. അദ്ദേഹത്തിൻ്റെ സ്വഭാവത്തെ സംബന്ധിച്ചു തനിക്ക് നല്ലപോലെ ബോധ്യമുണ്ട്. മന്ത്രിയായിരിക്കെ കെ രാധാകൃഷ്ണൻ ജനങ്ങൾക്കുവേണ്ടി ചെയ്ത ഉപകാരങ്ങൾ ജനങ്ങൾക്ക് അറിയാമെന്നും അതുകൊണ്ടാണ് വോട്ടഭ്യർഥിച്ചു താൻ എത്തിയതെന്നും കലാമണ്ഡലം ഗോപി വീഡിയോയിൽ പറഞ്ഞു.